الثلاثاء، 10 فبراير، 2009

التاج ما له وما عليه

أولا اسمحولي اكتب بالعاميه المصريه علي غير خط سير المدونه ولكن لان المناسبه مختلفه فهو تاج
والتاج في عرف المدونين عباره عن مجموعه اسئله بهدف التعرف علي شخصيه المدون

وانا بصراحه مليش في التيجان بس التاج المره دي مش من اي حد ده من قريبتي وحبيبتي وصاحبتي حنان صاحبة مدونة رياح الحنين
(بنت خالي ), بجد يا حنونه لو التاج ده من اي حد تاني مكنتش قبلته
انا دايما مؤمنه ان الانسان بيفضل طول عمره يتعلم جوه نفسه ويكتشف فيها ، علشان كده انا مش حقدر اتكلم عن نفسي ولا حعرف احكم عليها
يا حن معلش سامحيني انا حجاوب اللي حقدر عليه والباقي متروك لاصاحبي وحبايبي هما اقدر علي الإجابة


السؤال الأول : بدأتِ التدوين امتي ؟ودخلتِ العالم ده ازاي ؟

بدأت التدوين في 26 مارس 2008 ، دخلت العالم ده فجأة لاني طول عمري تقريبا بكتب لنفسي ومكنتش بحب انشر لحد ما قريت مقال لشريف عرفه عن تسويق الموهبه فعملت اسبيس علي الهوت ميل ونشرت علي الفيس بووك وكنت حاطه المدونه كخطوه بعيده المدي ويشاء القدر ان ايملاتي تتسرق وبالتالي الاسبيس بتاعة الهوت ميل وحساب الفيس بووك فكانت المدونه فجأه وبدون سابق انذار

السؤال الثاني : ايه كان انطباعك في البدايه ؟

التدوين متنفس من لا متنفس له

السؤال الثالث : مين اكتر حد بتحب تعليقه عالبوست الجديد ؟

حد حاسس كلماتي قبل ما يكون فاهمها (:

السؤال الرابع : ايه أهم حاجه اتعلمتها في عالم التدوين ؟

الكتاب تربطهم علاقه اقوي من الرحم واصدق من الدم

السؤال الخامس : ايه اكتر حاجه كرهتها ؟

اكتر حاجه كرهتها في التدوين الربط بين السياسيه والتطاول يعني بحس ان في فئه مش بسيطه بتعبر عن أراءها بصفاقه شديده
مهما كان رايك صح ومهما كانت وجهة نظرك لازم تعبر عنها باحترام ، لازم تتوجد ثقافة الاختلاف والاحترام

السؤال السادس : حاسس ان التدوين ليه تأثير ؟

التعبير ليه تأثير والتفكير له تأثير والاحساس له تأثير والتنفس حياة ، علشان كده التدوين له تأثير وتأثير قوي جدا سواء سلبي او ايجابي علشان كده انا بحمل المدونين مسؤلية كل حرف بيكتبوه

السؤال السابع : تهدي التاج لمين ؟

دي اكتر حاجه حيرتني بس ممكن نقول الورده البيضا صحيح انا معرفهاش شخصيا ولا علاقتي بيها جامده اوي بس بحس ان كلماتها بتكمل كلماتي وافكارها بتكمل افكاري وبجد حبيتها جدا في الله

التاج التاني ويا خوفي منه

السؤال الأول : اذكر ستة اسرار لا يكتشفها من يقابلك لاول مره ؟

السؤال ده متروك للي يقدر يجاوب

السؤال الثاني : سبع حاجات نفسك تعملهم ؟

(1) نفسي اكون أنا ، أكون نفسي
(2) نفسي اركب حصان واجري علي البحر ، يجري الحصان ميقفش ولا حاجه تعطله
(3) نفسي اعمل حاجه للجيل الجاي علشان اولادي ميلمونيش ولو سألوني عملتي لينا ايه اقدر اجاوب
(4) نفسي احقق مشروع العمر رؤيتي البعيده واللي مينفعش اصرح بيها
(5) نفسي اوي اطلع عمره او حج في اقرب وقت ادعولي
(6) نفسي في عروسه ودبدوب ومخده علي شكل قلب وورده روز
(7) نفسي املك عصاية سحرية تمحي الشقي من وشوش الناس
السؤال الثالث : سبع حاجات معرفتش تعملهم ؟
(1) عدم التفكير
(2) التركيز في الدراسه طبعا
(3) التنازل عن مبادئي
والباقي متروك برضه للي عنده اجابه

السؤال الرابع : سبع حاجات دايما بتقولهم ؟
(1) ما علينا
(2) الحمد لله
(3) اوكي
(4) ماشي
(5) ربنا يكرمك
(6) نعم
(7) ايه

السؤال الخامس : سبع مشاكل في حياتك ممكن تحلهم بالفلوس ؟
يا ريت كل المشاكل نقدر نحلها بالفلوس
المشكله في النفوس مش في الفلوس

السؤال السادس : سبع اماكن بتحبهم ؟

(1) كورنيش دمنهور
(2) بحر اسكندريه
(3) بيتنا اللي في البلد
(4) مدينة السادات
(5) مسرح مجمع مبارك ومحدش يسأل ليه
(6) كل مكان وكل شارع وكل جدار وكل حبة رمل كان ليا معاها ذكري حلوه او مره
(7) استاد دمنهور

السؤال السابع : اشخاص بتحبهم غير ماما وبابا واخواتي ؟

حقول مين ولا مين
اصحابي وقرايبي ومعارفي ، الحمد لله انا اكبر نعمه من ربنا عليا البشر دايما بيرزقنا بناس نقيه
ممكن اقول دينا سيف الدين ، مي القوني ، سهام السعداوي ، مروي النجار ، الشيماء تاج الدين وطبعا انتي يا حنونه
عمر وحازم ولاد اختي وحسن ابن اخويا
كل صناع الحياة بجد انتم غالين علي جدا وانا بحبكم جدا جدا من اسكندريه لاسوان انتم شباب نضيف وعايز يعمل
خالي د سمير الشافعي وخلاتي وعيلتي كلها زوجات اخواتي (طبعا معزتهم من حبي لاخواتي )
ناس كتير اوي دكتوره منال ، علا ، جيهان ، سارة
كل انسان عنده فكر واخلاص وبيسعي بحبه في الله

السؤال الثامن : مدونين بتحب تقرالهم ؟
طبعا ابيه ايمن (ابن خالتي ) صاحب مدونة الينابيع الحزينة ، الوردة البيضا ، واكيد حنونه (رياح الحنين ) ، وموناليزا وناس كتير جدا جدا

السؤال التاسع : تمرر الواجب ده لمين ؟
الورده البيضا

س : ايه الحاله اللي بتكون فيها وانت بتكتب وايه طقوسك ؟
معرفش غير انها حالة من اللا وعي الواعي ومحدش يقولي ازاي

هناك 30 تعليقًا:

أيمن جمال الدين يقول...

إجابات مقنعة وجميلة..تدل على جمال خارجي وداخلي.. ورقة مشاعر وإحساس عميق بقيمة الكلمة في دنيا الصور والزينات الزائفة..
سرني طبعا أن أكون ضمن من تقرئين لهم وربما لا يعرف قراءك أنت أنني دخلت عالم التدوين بنصيحة وتشجيع منك بل وإلحاح رقيق أيضا..
دمت مبدعة صادقة وإنسانة حقيقية
وفي انتظار المزيد من كتاباتك الجميلة..

شيماء زايد يقول...

ابيه ايمن

بجد حضرتك اديب وانسان
والاديب من يعبر بالكلمات عن مكنونات النفوس والانسان من يدرك ما وراء النفس البشريه
يسعدني ويشرفني ان اقرأ كلماتك لتخبرنا في انفسنا ما لا نعرفه
شكرا ليك يا فندم وانا اللي في انتظار كلماتك اللي بنتتلمذ عليها

hasona يقول...

السلام عليكم

اجاباتك تحمل الكثير بين طياتها
لكنك أهملتي بعض التفاصيل ( الاسئلة)
وبشفافية تحسدي عليها

التدوين متنفس من لا متنفس له-حد حاسس كلماتي قبل ما يكون فاهمها

عندما تئن الكلمة وتصرخ لتعبر عن ما يدور في أعماق صاحبها
وتخرج من القلب الي كل قارئ يحمل بين ضلوعه قلب ينبض- فيشعر بتلك الآنات

وبتعبري بدون تفكير



تقبلي تحياتي

موناليزا يقول...

انتى جميلة اوى على فكرة:)
وربنا يحقق لك كل اللى بتتمنيه
ويكتبلنا سوا زيارة بيته الحرام قريبا اللهم امين

شيماء زايد يقول...

hasona

كل التحية لك
ربنا يكرمك

كذلك تعليقكم الصادق يصل بوضوح وشفافية

شكرا لك

شيماء زايد يقول...

موناليزا

انتي اللي عنيكي جميله لا تري إلا الجمال
يارب اللهم امين
عما قريب

الوردة البيضا يقول...

عزيزتي وحبيبتي شيماء
لا أجد ما يكفي من الكلمات ليصف سعادتي بتقديرك لي والمشاعر الصادقة الجميلة التي غمرتني بها... ربنا يديم المعروف، وكوني على ثقة أن التقدير والود والاحترام متبادل بنفس الدرجة من جهتي.
من دواعي شرفي أن تختصيني بإهداء هذا التاج، وسأجيب عليها بكل سرور، ولكن أعذريني إن تأخرت قليلا في الرد بسبب أكوام مكدسة من العمل فوق رأسي هذه الأيام.
وبالنسبة لإجاباتك فهي رائعة وتعبر عن روحك الشفافة الجميلة، وإن كانت كما ذكر بعض الأصدقاء تفتقر للمزيد من التفاصيل.

romansy يقول...

كل تاج وانتى بالف خير وسلام
يارب يحقق احلامك وامنيلتك

اسماء واحلام فى وجدانى يقول...

لو عدتى بذكراتك الى اول تعليق لى

على مدونتك ستعرفين ان احساسى بجمال قلبك وجمال قلمك لم يكن مجاملة منى لك

دينا يقول...

حبيبيتى وصديقتى الجميلة والاديبة الرائعة شيماء

اجاباتك هى شخصيتك اللى كتير ممكن ميكنش تخللهاودة لانة مشفش شيماء من جواها مشفش البراءة والجمال مشفش حلم كبير جميل له تاثير فالمستقبل مشفش الجنون والرقة والطفولةوالحب والحنان والعقل والحكمة

لو من هنا لبكرة مش حقدر اجيب شيماء لان جواها كتير جدا مخزون رائع وكل يوم بيتولد جواها معنى جديد واجمل وبيكمل المعانى الجميلة اللى جواها

ولو اتسالت سؤال تهدى التاج لمين اكيد لملكتى المتوجة باجمل واسمى المعانى

بارك الله لكى وفيكى والى الامام وبدون معوقات ان شاء الرحمن

شيماء زايد يقول...

الورده البيضا

كل الحب والود والتقدير ليكي وفي انتظار ردك علي التاج علي احر من الجمر
دمتي مبدعه ومتأقله
وفيما يخض التفاصيل
انا كاتبة قصه قصيره عزيزتي
يعني التكثيف والايجاز سمه كل ما اكتب ((:
صح

شيماء زايد يقول...

romansy

كل تاج وانت في خير وسلام غير سلبي
تحياتي

شيماء زايد يقول...

اسماء واحلام في وجداني

النفوس الطيبه تري كل جميل
شكرا لك

شيماء زايد يقول...

دينا( دنيتي الطيبة)

مش عارفه اقولك غير انا لو كده فعلا يبقي انا كده بيكي
دينا انا الدنيا صالحتني بيكي وكانت كريمه جدا معايا
نعم !
ايه !

الشيماء تاج الدين يقول...

اولا : حوار اكثر من رائع

واجابات رقيقة وذكية فى نفس الوقت

ثانيا : اسعدنى جدا ان اجد اسمى ضمن اجاباتك فجزاك الله خيرا

واحبك الله الذى احببتنى فيه

ثالثا : اتشوق لقراءة المزيد من ابداعاتك فلا تتأخرى علينا يا كاتبة المستقبل ..

تحياتى
والى الامام دائما

اختك

الشيماء تاج الدين

ادم المصرى يقول...

واو دا انتى طلعتى بجد فخر لى اى بنت فى

امنيتها

ربنا يحققلك احلامك واكيد مدام احلامك

كلها فلله يبقه ان شاء الله هتشفيها

وهتعشيها

وانما الاعمال بلنيات ولكل أمرأ ما نوا

وربنا يحققلك حلمك الاجمل وتشوفى بيت الله

الحرام بس افتكرينى عشان تدعيلى بلئسف

وتجبيلى معاكى مصحف المدينه الصغير ده

طماع انا صح
ههههههههههههههههههه

تحياتى لكى

صوت من مصر يقول...

اول تعليق فى البلوج بتاج
ايه الحلاوه دى
بس اكثر شىء عجبتى الاوعى

انا ودماغي يقول...

إجاباتك بجد جميلة اوى و مقنعة
و بتدل على شخصية واعية و جميلة أوى

تحياتى ليكى :)

تايه في وسط البلد يقول...

بعض الناس تقنعني اجاباتهم علي التاج بان اعيد نظر فيه

تحياتي لرقة شعورك

ولا ازيد

شيماء زايد يقول...

ادم المصري

يا فندم نطلع بس وكل الهدايا امرها سهل دعواتكم

شيماء زايد يقول...

صوت من مصر

الا وعي بس
ولا اللا وعي الواعي

شيماء زايد يقول...

أنا ودماغي

شكرا ليكي يا جميلة التعبير

شيماء زايد يقول...

تايه وسط البلد

وبض الناس تقنعني تعليقاتهم بأن اعيد نظر في اجاباتي

ولكنني لا اكتشف ما هو ازيد !

تحياتي وامتناني

شيماء زايد يقول...

الشيماء تاج الدين


مش ناسياكي
بس تاني حقولك اصبري عليا ومتزعليش مني

آه وكفى يقول...

السؤال الخامس : ايه اكتر حاجه كرهتها ؟

اكتر حاجه كرهتها في التدوين الربط بين السياسيه والتطاول يعني بحس ان في فئه مش بسيطه بتعبر عن أراءها بصفاقه شديده
مهما كان رايك صح ومهما كانت وجهة نظرك لازم تعبر عنها باحترام ، لازم تتوجد ثقافة الاختلاف والاحترام

وانا كمااااااااااااااان
في ناس بتحسي انك عيزة تكسري الكيبورد على دماغتهم وخصوصا لما تحسي في كلامهم بالسخرية يابااااااااااي
او يعملولك ان هما فاهمين وانتي أوله


تحياتي لدماغك

حنان الشافعي يقول...

شيمو حبيبة قلبي
ربنا يخليكي ليا يارب
امين
امين
اشكرك طبعا علي انك قبلتي هديتي
وكده عرفت ححاجات كتير مكنتش اعرفها عنك اجاباتك فعلا رقيقه ومسؤله
وحكيمه حتي في ردك
ربنا يكرمك وتحققي كل اللي نفسك فيه
وهعرف ليه مسرح مجمع مبارك
مش انا الي يتقالي متسئليش
ههههههههههههههههه
تحياتي يا قمري

شيماء زايد يقول...

آه وكفي

جميل اننا اتفقنا عزيزتي

مرور كريم

شيماء زايد يقول...

حنان

للاسف يا حنان مش انتي اللي يتقال لك متسأليش

وعامة الايام جاية كتير وبكرة تعرفي
بس اتمني تعرفي بينا مشش علي الملأ
يعني نبطل ثقافة التدبيس والتاجات وكده

ربنا يكرمك ومتحرمش منك

غير معرف يقول...

حبيبتى شوشو
طبعا انا مش حقول اى كلام على اجاباتك انا حقول حاجه واحده بس ان انا مش محتاجه تاج عشان اعرف اللى جواكى او اعرفك لانك حته منى واغلى حته عندى وكل يوم بشوف لك نجاح كانى شفته لنفسى ربنا يحقق لك كل احلامك

شيماء زايد يقول...

دودو

حبيبتي انتي مش محتاجه اي حاجه ، انا معموله منك